Gjykata Speciale e ka miratuar kërkesën e avokatit Ben Emerson, për tërheqje nga ekipi mbrojtës i ish-kryetarit të Kuvendit, Kadri Veseli.

Sipas njoftimit, Veseli dhe Emmerson kanë konfirmuar se janë pajtuar për ndërprerje të marrëdhënies avokat-klient bazuar në “një prishje të parevokueshme në marrëdhënien avokat-klient”, shkruan Arbresh.info.

Gjykata Speciale ka theksuar se kjo nuk do të shkaktojë vonesa në procesin gjyqësor.

“Më 21 gusht 2024, Trupi Gjykues në çështjen Thaçi dhe të tjerët miratoi përfundimin e përfaqësimit ligjor të Kadri Veselit nga mbrojtësi Ben Emerson. Veseli dhe Emersoni u pajtuan me këtë vendim, duke bërë që Trupi Gjykues të aprovojë përfundimin e përfaqësimit ligjor për arsye të vlefshme. Gjithashtu, Trupi Gjykues u bind se do të sigurohet vazhdimësia e përfaqësimit të Veselit dhe se ndryshimi i kryembrojtësit nuk do të shkaktojë vonesa në procesin gjyqësor”, njofton DhSK.

Gjykata Speciale ka bërë të ditur se vendimi do të hyjë në fuqi pasi të caktohet kryembrojtësi i ri dhe administratorja e Dhomave të Specializuara të Kosovës ftohet të marrë të gjitha masat e nevojshme sa më shpejt që të jetë e realizueshme.

Dhomat e Specializuara të Kosovës në Hagë kanë dhënë detaje si ka ardhur deri te ky vendim:

Sipas njoftimit, ky vendim erdhi me kërkesë të Veselit.

Në vendimin e publikuar në faqen zyrtare të DhSK, thuhet se më 8 gusht 2024, Sekretari i dërgoi Kolegjit letrat nga Kadri Veseli dhe avokati Ben Emmerson në lidhje me përfundimin e përfaqësimit të avokatit.

Ndërkaq, thuhet se “më 20 gusht 2024, Sekretari i dërgoi Panelit dokumente të tjera në lidhje me kërkesën e z. Veseli për ndërprerjen e parakohshme të përfaqësimit të z. Emmerson si avokat kryesor”.

“Më 21 gusht 2024, me kërkesë të Panelit, palët konfirmuan në seancë private se nuk dëshirojnë të bëjnë ndonjë parashtresë për këtë çështje”, u tha mes tjerash në vendim.

“Më 7 gusht 2024, Sekretaria pranoi, përmes bashkë-avokates së z. Veseli, znj. O’Reilly, një letër nga z. Veseli, ku ai kërkonte tërheqjen e mbrojtësit ‘për shkak të një prishjeje të parevokueshme në marrëdhënien e avokatit klient’; dhe (ii) më 8 gusht 2024, z. Emmerson njoftoi Sekretarin, me letër, për tërheqjen e tij të hershme si avokat, pas vendimit të z. Veseli për të shkarkuar avokatin nga detyrat e tij”, thuhet mes të tjerash.

Po ashtu, thuhet se më 16 gusht 2024, Sekretaria ka pranuar një formular të nënshkruar në të cilin Veseli kërkon emërimin e z. Rodney Dixon si avokati i tij i ri kryesor.

Në kuadër të këtij vendimi, thuhet se “ekipi mbrojtës i z. Veseli aktualisht përbëhet nga njëmbëdhjetë persona, përkatësisht një avokat, tre bashkë-avokatë, gjashtë bashkëpunëtorë ligjorë/anëtarë të ekipit mbështetës dhe tre praktikantë”. Po ashtu, thuhet se Veseli dhe Emmerson kanë thënë se Veseli “do të vazhdojë të përfaqësohet nga Bashkë-Avokatja Znj. O’Reilly dhe znj. Rowan”.

“Z. Emmerson tregoi në letrën e tij se ai ‘do të përpiqet të sigurojë që tërheqja e tij nuk e paragjykon z. Veseli gjatë kësaj periudhe tranzicioni dhe se interesat [e z. Veseli] mbrohen”, thuhet më tej në vendim.

Vendimi thotë se Sekretaria pranoi një formular në të cilin Veseli kërkon emërimin e Dixon si avokat të ri të tij.

Theksohet se “Paneli është i kënaqur se ndryshimi i avokatit kryesor nuk do të shkaktojë vonesa në procedurë. Paneli thekson në këtë drejtim se z. Veseli do të vazhdojë të ndihmohet nga dy avokatë të tjerë, të cilët kanë qenë të përfshirë në këtë rast për një kohë”.

“Për këto arsye, Paneli aprovon tërheqjen e z. Emmerson si avokat i z. Veseli. Ndërprerja e përfaqësimit të z. Emmerson për z. Veseli si avokat do të hyjë në fuqi ditën kur një avokat i ri kryesor caktohet nga Sekretari për të përfaqësuar z. Veseli. Në lidhje me këtë, Paneli fton Sekretarin që të ndërmarrë të gjithë hapat e nevojshëm për të emëruar avokatin kryesor për z. Veseli sa më shpejt që të jetë e mundur”, u theksua në vendim.

Në fund, Trupi Gjykues miratoi zyrtarisht ndërprerjen e përfaqësimit të Ben Emmerson si avokat i Kadri Veselit, vendim ky që do të hyjë në fuqi pas emërimit të avokatit të ri kryesor./Arbresh.info/

Dukumentin në anglisht mund ta lexoni KËTU.